АМЕРИКАНСКИОТ АМБАСАДОР ЈА ПОСЕТИ ОПШТИНА АЕРОДРОМ
16.02.2012 15:33
Амбасадорот на САД во Република Македонија, Пол Волерс, денес, 16.2.2012 година, ја посети Општина Аеродром и одржа работна средба со градоначалникот Ивица Коневски.
Градоначалникот Коневски и амбасадорот Волерс на средбата разговараа за приоритетите активности и проекти кои ги презема Општина Аеродром за подобрување на животот на граѓаните, а беа презентирани и можностите за инвестирање, поточно потенцијалите, ресурсите и капацитетите со кои располага општината.
„Општина Аеродром работи на многу проекти и програми кои се главно од областа на културата, спортот, образованието“ изјави градоначалникот Коневски, додавајќи дека токму партнерската поддршка од други земји во реализацијата на овие проекти е добродојдена.
Амбасадорот Волерс изјави дека американската амбасада во Скопје е силен поддржувач на локалната самоуправа во Република Македонија. Тој посочи дека амбасадата на САД преку УСАИД има одлична соработка со Општина Аеродром во реализацијата на проектите кои ги спроведуваат за македонските граѓани.
Општина Аеродром досега има реализирано неколку заеднички проекти со УСАИД, и тоа, реновирање на покривот на ОУ „Гоце Делчев“ и отворање кабинет по роботика во училиштата „Љубен Лапе“ и „Лазо Ангеловски“ кои се реализираа во соработка со УСАИД ПЕП.
Минатата година Општина Аеродром потпиша меморандум за соработка со УСАИД КАРАНА Корпорација при што беа одржани 5 презентации за мали и средни претпријатија за алтернативни извори на финансирање, додека со американската „ЛинкАкрос“ во тек се 17 обуки за невработени, како и за мали средни претпријатија.
16.2.2012
Општина Аеродром
-d2c4ff49.jpg)
